kovaibereans

நீ ஏன் ஒரு கிறிஸ்தவனாக இருக்கிறாய்?

யார் கிறிஸ்தவன்?

இன்று அநேகர் தங்களை கிறிஸ்தவர்கள் என்று சொல்லுகிறார்கள். நீங்களும் அப்படித்தானா? ஒருவேளை நீங்கள் இதைக்குறித்து நிச்சயமற்றவர்களாக இருக்கிறீர்களோ! ஒருவேளை நீங்கள் இதைக் குறித்து அதிக நிச்சயமுள்ளவர்களாக இருந்துகொண்டு பிறர் என்ன செய்கிறார்கள் என்று கவனிப்பவர்களாக இருக்கிறீர்களா? ஒன்று கவனித்தோமென்றால், இன்று அமேரிக்காவில் உள்ள கைதிகளில் பெரும்பாலானவர்கள் தங்களை கிறிஸ்துவர்கள் என்று சொல்லுபவர்களாக இருக்கிறார்கள்!

கிறிஸ்தவர்கள் என்று எவ்வுளவு காலம் முன்பாக அறியப்பட்டோம். கிறிஸ்தவர்கள் என்கிற பதம் முதல் நூற்றாண்டில் கொடுக்கப்பட்டது - பெந்தகோஸ்தே நாளிற்கு பிறகு சுமார் ஐந்து வருடங்கள் கழிந்து. முதல் முதல் அந்தியோகியாவிலே சீஷர்களுக்குக் கிறிஸ்தவர்கள் என்கிற பேர் வழங்கிற்று. (அப். 11:26). இதில் சீஷர்கள் என்றால் கற்றுக்கொள்பவர் அல்ல தீவிரமாக போதகரை பின்பற்றுபவன் என்று அர்த்தம். அந்தியோகியா பட்டணத்திலுள்ள சபை சபை என்றால் உலகத்திலிருந்து அழைக்கபட்டவர்கள், (அப். 13:1) ஆகையால் கிறிஸ்தவர்கள் என்றால் இயேசுவை பின் செல்லவும் அவருக்கு சீஷர்களாக இருக்கவும் இந்த உலகத்திலிருந்து அழைக்கப்பட்டவர்கள் மாத்திரமே.

இந்தியாவிலிருக்கும் 2.4 சதவித மக்களும் கிறிஸ்தவர்களா? இயேசு சொன்னார், நான் உங்களை உலகத்திலிருந்து தெரிந்து கொண்டபடியினாலும், உலகம் உங்களைப் பகைக்கிறது (யோவான் 15:19). அவர்களை இயேசு சிறு மந்தை என்றே அழைக்கிறார் (லூக். 12:32) 

கிறிஸ்தவர்கள் என்ன செய்வார்கள்?

இயேசுவின் சீடர்கள் என்றால் அவர்கள் சத்தியத்தை அறிந்து அதற்கு கீழ்ப்படிபவர்களாக இருப்பார்கள். இயேசு, நீங்கள் என் உபதேசத்தில் நிலைத்திருந்தால் மெய்யாகவே என் சீஷராயிருப்பீர்கள்; சத்தியத்தையும் அறிவீர்கள், சத்தியம் உங்களை விடுதலையாக்கும் என்றார். இயேசுவின் சீடர்கள் அவரின் வார்த்தையில் நிலைத்திருக்க தினமும் வேதத்தை தியானிப்பார்கள். வேத தியானிப்பதினால் சத்தியத்தை அறிந்தவர்களாக இயேசுவின் சீஷர்களாக தங்களுக்குள்ள எல்லாவற்றையும் துறந்து விடுவார்கள், (லூக். 14:33). மேலும் இயேசு சொல்லுகையில் தன் ஜீவனை இரட்சிக்க விரும்புகிறவன் அதை இழந்துபோவான், என்னிமித்தமாக்கம் சுவிசேஷத்தின் நிமித்தமாகவும் தன் ஜீவனை இழந்துபோகிறவன் அதை இரட்சித்துக்கொள்வான் என்றார். (மாற். 8:35). என்னவென்றால் நமக்குள்ள எல்லாம் இயேசுவிற்கும் அவர் சொல்லும் காரியங்களுக்கும் பயன்படுத்துவது ஆகும். இன்னும் கடுமையாக சொல்லும் போது, யாதொருவன் என்னிடத்தில் வந்து தன் தகப்பனையும் தாயையும் மனைவியையும் பிள்ளைகளையும் சகோதரரையும் சகோதரிகளையும் தன் ஜீவனையும் வெறுக்காவிட்டால் (குறைவான அன்பு செலுத்துவது என்பதே இதன் பொருள்) எனக்கு சீஷனாகயிருக்கமாட்டான். என்கிறார் இயேசு (லூக். 14:26). மீண்டும் சொல்லுகையில் ஒருவன் என் பின்னே வர விரும்பினால் அவன் தன்னை வெறுத்து, தன் சிலுவையை அநுதினமும் எடுத்துக் கொண்டு, என்னைப் பின்பற்றக்கடவன் என்றார் (லூக். 9:23).

சீஷத்துவதிற்கு இயேசு போடும் நிபந்தனைகள் சற்று கடினமானதேயாகும். அவரின் தேவை அவரோடு இருக்கும்படியாக ஒரு சிறுமந்தையே. அதேசமயம் அநேகர் இயேசு மத். 7:22.23 தீர்க்கதரிசனமாக சொன்னபிரகராமுள்ள 'கிறிஸ்துவர்களாக' இருப்பார்கள். அந்நாட்களில் அநேகர் என்னை நோக்கி, கர்த்தாவே! கர்த்தாவே! உமது நாமத்தினாலே தீர்க்கதரிசனம் உரைத்தோம் அல்லவா? உமது நாமத்தினாலே பிசாசுகளை துரத்தினோம் அல்லவா? உமது நாமத்தினாலே அநேக அற்புதங்களை செய்தோம் அல்லவா? என்பார்கள்; அப்பொழுது, நான் ஒருக்காலும் உங்களை அறியவில்லை (கிறிஸ்தவர்களாக), அக்கிரமச் செய்கைகாரரே, என்னைவிட்டு அகன்றுபோங்கள் என்று அவர்களுக்குச் சொல்லுவேன். ஆம், சீஷத்துவம் என்பது மிகவும் கடினமாக பின்பற்ற வேண்டிய ஒரு காரியமாக இருக்கிறது. ஒரு உண்மையான கிறிஸ்தவன் செல்வங்களோ அல்லது உடல் சுகமோ வேண்டுவது கிடையாது, மாறாக ஆவிக்குரிய ஆசிர்வாதமான நூறு மடங்கு இந்த உலகத்திலும் மறுமையில் நித்திய ஜீவனுக்காகவே ஜெபிப்பான் (மாற். 10:30)

பொதுவாக கிறிஸ்தவர்கள் என்றால் ஒரு சமுதாயம், பெரும்பாலும் அப்படியாகவே இருக்கிறார்கள். மாறாக வேதத்தின் பிரகாரமாக கிறிஸ்தவன் என்றால் ஒரு சிறிய கூட்டத்தின் வாழ்வுமுறையே. எல்லா கிறிஸ்தவர்களும் தங்களுக்கு உண்டானதை விட்டு-விட்டு கிறிஸ்துவை பின் பற்றவில்லையே. நீங்கள் எல்லாவற்றையும் விட்டு பின் பற்றுபவராக இருக்கிறீர்களா?


ஏன் சிலர் கிறிஸ்தவர்களாக மாறுகிறார்கள்?

வரப்போகும் நித்திய நியாயத்தீர்ப்பிற்கு பயந்து சிலர் கிறிஸ்தவர்களாக மாறுகிறார்கள். ஏனேன்றால், பாவத்தின் சம்பளம் மரணம்; தேவனுடைய கிருபைவரமோ நம்முடைய கர்த்தராகிய இயேசுகிறிஸ்துவினால் உண்டான நித்தியஜீவன். (ரோம். 6:23). கர்த்தரோ அவரின் நாமத்தின் நிமித்தம் நம் பாவங்களை மன்னிக்கிறார் (சங். 25:11). அப்படியாக பவுல் எபேசியருக்கு எழுதும் போது, இவருடைய (இயேசுவின்) இரத்தத்தினாலே பாவமன்னிப்பாகிய மீட்பு இவருக்குள் நமக்கு உண்டாயிருக்கிறது (எபே. 1:7).

சிலர் கிறிஸ்தவர்களாக இருந்தால் நல்ல ஐஸ்வரியத்துடனும், நல்ல உடல் சுகத்தோடும் வாழலாம் என்றும், இரகசிய இராஜ்ஜியத்தில் இது நிறைவேறும் என்று நினைக்கிறார்கள். என்ன ஒரு எண்ணம்! கிறிஸ்தவம் என்பது தேவன் எனக்கு என்ன செய்தார்? என்று இல்லாமல் நான் தேவனுக்காக என்ன செய்தேன் என்பதே ஆகும். உமது நாமத்தின் நிமித்தம் எனக்கு வழிகாட்டி, என்னை நடத்தியருளும். (சங். 31:3)

சுய கிறிஸ்தவர்களும், கிறிஸ்துவை சார்ந்த கிறிஸ்தவர்களும்.

சுய கிறிஸ்தவர்கள் என்று கொரிந்து சபையில் அனேக கிறிஸ்தவர்கள் இருந்தார்கள். பவுல் 1 கொரி 4:8-14ல் அவர்களுக்கு புத்தி சொல்லுவதை நாம் படிக்க முடியும்:

இப்பொழுது திருப்தியடைந்திருக்கிறீர்களே, இப்பொழுது ஐசுவரியவான்களாயிருக்கிறீர்களே, எங்களையல்லாமல் ஆளுகிறீர்களே, நீங்கள் ஆளுகிறவர்களானால் நலமாயிருக்கும்; அப்பொழுது உங்களுடனே கூட நாங்களும் ஆளுவோமே; எங்களுக்குத் தோன்றுகிறபடி தேவன் அப்போஸ்தலர்களாகிய எங்களை மரணத்துக்குக் குறிக்கப்பட்டவர்க்ள் போலக் கடைசியானவர்களாய்க் காணப் படப்பண்ணினார்; நாங்கள் உலகத்துக்கும் தூதருக்கும் மனுஷருக்கும் வேடிக்கையானோம்.; நாங்கள் கிறிஸ்துவின் நிமித்தம் பைத்தியக்காரர், நீங்கள் கிறிஸ்துவில் புத்திசாலிகள்; நாங்கள் பலவீனர், நீங்கள் பலவானகள்; நீங்கள் கனவான்கள், நாங்கள் கனவீனர்.; இந்நேரம்வரைக்கும் பசியுள்ளவர்களும் தாகமுள்ளவர்களும் நிர்வாணிகளும், குட்டுண்டவர்களும், தங்க இடம் இல்லாதவர்களுமாயிருக்கிறோம்; எங்கள் கைகளினாலே வேலைசெய்து பாடுபடுகிறோம், வையப்பட்டு அசீர்வதிக்கிறோம்; துன்பபட்டு சகிக்கிறோம்; தூஷிக்கபட்டு, வேண்டிக்கொள்ளுகிறோம்; இந்நாள்வரைக்கும் உலகத்தின் குப்பையைப்போலவும், எல்லாரும் துடைத்துப்போடுகிற அழுக்கைப்போலவு -மானோம்; உங்களை வெட்கப்படுத்தும்படிக்கு நான் இவைகளை எழுதவில்லை, நீங்கள் எனக்குப் பிரியமான பிள்ளைகளென்று உங்களுக்குப் புத்திசோல்லுகிறேன்.

புத்தி சொல்லியப் பிறகு அவர்களை கிறிஸ்துவை சார்ந்திருக்கும் படி சொல்லுகிறார், ஆகையால், என்னைப் பின்பற்றுகிறவர்களாக இருங்களென்று உங்களுக்குப் புத்தி சொல்லுகிறேன்; நான் கிறிஸ்துவை பின்பற்றுகிறது போல், நீங்கள் என்னைப் பின்பற்றுகிறவர்களாயிருங்கள். (1 கொரி. 4:16; 11:1). கிறிஸ்துவை உண்மையாக பின் பற்றினபடியே பவுலால் ஏழ்மையிலும், போராட்டங்களிலும் கிறிஸ்துவுக்கு மாதிரியாக இருக்க முடிந்தது. இயேசு ஏழையாக பிதாவின் ஊழியம் செய்தாரா? அவர் ஐசுவரியவமுள்ளவராக இருந்தும், நீங்கள் அவருடைய தரித்திரத்தினாலே ஐசுவரியவான்களாகும்படிக்கு உங்கள் நிமித்தம் தரித்திரரானாரே (2 கொரி 8:9)

ஆனால் செழிப்பின் உபதேசக்காரர்கள் இந்த வசனத்தை தங்களுக்கு சாதகமாக பயன்படுத்தி, தேவன் கிறிஸ்தவர்கள் செல்வந்தரகளாக இருக்க விரும்பினதால் தான் இயேசு கிறிஸ்து தரித்திரர் ஆனார் என்று கூறுவார்கள். மெய்யாகவே இயேசு செல்வந்தர் தான் என்று சொல்லுவார்கள், முந்தைய மகிமையைப் பார்க்கிலும் தான் அவர் ஏழை என்றும் முடிப்பார்கள். தன் ஏழ்மையைக் குறித்து லூக். 9:58ல் இயேசு சொன்னதையே பார்ப்போம், நரிகளுக்குக் குழிகளும் ஆகாயத்துப் பறவைகளுக்குக் கூடுகளும் உண்டு, மனுஷகுமாரனுக்கோ தலை சாய்க்க இடமில்லை என்றார். இந்த வசனம் இன்னும் அதிகமாக இதற்குப் பொருந்துவது ஏனென்றால் இதற்கு முந்தைய வசனத்தில்தான் ஒருவன் இயேசுவிடம் நீங்கள் எங்கு சென்றாலும் பின்பற்றுவேன் என்று சொல்லியிருந்தான். இயேசுவைப் பின்பற்றுவதினால் ஏழையாகத்தான் இருக்க வேண்டும் என்று சொல்லவில்லை, மாறாக நமக்கு உள்ளது அனைத்தையுமே அவரது காரியத்திற்கு செலவிடும்படி நாம் இருக்க வேண்டும். நாம் நம்மிடம் இருக்கும் எல்லாவற்றையும் அவரிடம் ஒப்பு கொடுத்திருக்கிறோமா?

கிறிஸ்தவர்களாக இருந்தால் செல்வந்தர்களாக இருக்க விருப்பப்படும் அனைவருக்கும் இந்த பிரபஞ்சத்தின் தேவன் (2 கொரி. 4:4) வெள்ளி தாம்பூலத்தில் வைத்து உலகத்தின் செல்வங்களை கொடுக்க ஆவலாய் இருக்கிறான் (மத். 4:8-11), இவர்கள் சுய நோக்கம் உள்ள கிறிஸ்தவர்கள், கிறிஸ்துவை நோக்கும் கிறிஸ்தவர்கள் அல்ல.

உண்மையென்னவென்றால், இயேசுவின் ஊழியம், பிதாவின் சித்தம் செய்யும்படி தன் சொந்த மற்றும் பூமிக்குரிய விருப்பங்களை வெறுத்து தம்முடைய ஆத்துமாவை மரணத்திலூற்றினார் (எபி. 10:9, எசா. 54:12). இந்த பலியை வேதம் பல உவமைகளின் மூலமாக நமக்கு எடுத்துக் காண்பிக்கிறது. எடுத்துக்காட்டாக, ஆசரிப்பு கூடாரத்தில் ஒரு மிருகம் பலியாக்கப் பட்டதைக் குறித்து நாம் வாசிக்க்ிறோம். இயேசு பிதாவின் சித்தத்தில் தன்னை முழுமையாக ஒப்புகொடுத்தத்தின் அடையாளமாக மூழ்கி ஞானஸ்நானம் எடுக்கிறார். இந்த ஞானஸ்நானம் எடுத்து மூன்று வருடங்கள் பின்பு இயேசு சொல்லுகிறார், ஆகிலும் நான் மூழ்கவேண்டிய ஒரு ஸ்நானமுண்டு, அது முடியுமளவும் எவ்வளவோ நெருக்கப்படுகிறேன். (லூக். 12:50) என்று பிதாவின் சித்தத்தின் ஆழத்தை விளங்க செய்கிறார். தன் பிதாவின் சித்தத்தை நிறைவேற்றும்படி பிறரின் நலனுக்காக தன்னையே பலியாக்கினார் (அப். 20:35), சத்தியத்திற்காகவும், நீதிக்காகவும் பாடு பட்டு (சங். 69:7-9), சிலுவையை சகித்தார் (எபி. 12:2-3).

யாக்கோபும், யோவானும் இயேசுவிடம் அவரின் இட மற்றும் வலப் பக்கத்தில் அமர இடம் கேட்ட போது இயேசு, நான் குடிக்கும் பத்திரத்தில் நீங்கள் குடிக்கவும் நான் பெறும் ஸ்நானத்தை நீங்கள் பெறவும் உங்களால் கூடுமா? என்று கேட்டார் (மாற். 10:35-39). யாக்கோபு மற்றும் யோவானிடம் சொன்ன அந்த கோப்பையும் அந்த ஸ்நானத்தையும் பெற நாமும் ஆயத்தமாக இருக்க வேண்டும். ஆகவே அப். பவுல் சொல்லுக்ிறார், நாம் அவரோடு (இயேசுவோடு) கூட மரித்தோமென்றால் அவரோடு கூட பிழைத்துமிருப்போம்; அவரோடுகூட பாடுகளை சகித்தோமானால் அவரோடேகூட ஆளுகையும் செய்வோம் (2 தீமோ. 2:11, 12). கிறிஸ்தவன் என்றால் தன்னை தானே உயர்த்தவும், செல்வம் சேர்க்கவும் இல்லாமல் மரணப் பரியந்தம் அவரோடு கூட பாடு பட ஆயத்தமாக இருக்க வேண்டும்.

நாம் கிறிஸ்தவர்களாக இருக்கும் காரணம்

ரோம். 6:3ல் பவுல், கிறிஸ்து இயேசுவுக்குள்ளாக ஞானஸ்நானம் பெற்ற நாமனைவரும் அவருடைய மரணத்துக்குள்ளாக ஞானஸ்நானம் பெற்றதை அறியாமலிருக்கிறீர்களா? என்று கேட்க்கிறார். ஆம், நாம் இயேசுவை பின் பற்ற வேண்டுமென்றால் நம் சுயத்திற்காக மரிக்க வேண்டும். அது என்னவென்றால் பாவம் இல்லை என்று தோன்றினாலும் இந்த உலக மோகங்களையும் இச்சைகளையும் தேவனுக்காக இழக்கவேண்டும்.

பவுல் 1 கொரி. 15:29ல் மரித்தவர்களுக்காக ஞானஸ்நானம் பற்றி கூறுகிறார். தேவனின் பார்வையில் கிறிஸ்தவர்களை தவிர மற்றவர் அனைவருமே பாவத்தினாலும், அக்கிரமங்களினாலும் மரித்தவர்கள் (எபே. 2:1). ஆகவே தான் இயேசு, மரித்தோர் தங்கள் மரித்தோரை அடக்கம் பண்ணட்டும் என்றார் (மத். 8:22). நாம் ஏன் கிறிஸ்தவர்களாக இருக்க வேண்டும்? கிறிஸ்துவின் சிலுவை மரணத்தில் பங்கு கொள்வதினால் இந்த உலகமே பயன் பெறுமே. அவரோடு கூட பாடு பட்டோமென்றால் அவரோடு கூட ஆளுகை செய்வோம் (2 தீமோ. 2:11, 12), இராஜாக்களாகவும் ஆசாரியர்களாகவும் இருந்து ஆயிரம் வருடங்கள் வரை (வெளி. 20:6) மரித்துக் கொண்டிருக்கும் மனித சமூதாயத்தை இயேசுவிற்காக ஆதாயப் படுத்தலாம்.

சுருக்கமாக, வேதம் சொல்லுவது:

(அ) உண்மையான கிறிஸ்தவர்கள் மிகவும் குறைவாகவே இருப்பார்கள், ஒரு சிறு மந்தையாக. 
(ஆ) சீஷத்துவம் என்பது மிகவும் கடினமான ஒரு பாதை
(இ) கிறிஸ்தவர்கள் இயேசுவுடன் 1000 வருடங்கள் பாவத்தில் மரித்த இந்த உலக மக்கள் மேல் ஆட்சி செய்வார்கள்.


தேவன் இந்த உலகத்தை மாற்றும் முயற்சியில் இருக்கிறாரா?

இயேசு வாக்களித்தார், ராஜ்யத்தினுடைய இந்தச் சுவிசேஷம் பூலோகமெங்குமுள்ள சகல ஜாதிகளுக்கும் சாட்சியாகப் பிரசங்கிக்கப்படும், அப்போது முடிவு வரும். (மத். 24:14) என்று. இந்த வசனத்தின் படி இப்பொழுதே எல்லோரும் இரட்சிக்கப் படும் நேரமா? எல்லாம் மற்றும் எல்லோரும் என்கிற வார்த்தைகள் வேதத்தில் அநேக இடங்களில் நாம் வாசிக்க முடியும். லூக். 2:10ல் ஒரு தேவ தூதன் இயேசுவின் பிறப்பின் நற்செய்தி கொடுக்கும் போது, பயப்படாதிருங்கள், இதோ, எல்லா ஜனத்துக்கும் மிகுந்த சந்தோஷத்தை உண்டாக்கும் நற்செய்தியை உங்களுக்கு அறிவிக்கிறேன் என்று உரைத்தது. 30, 31 வசனங்களிலும் எல்லோரும் பிரகாசமடையும்படி என்று உள்ளது. 1 தீமோ. 4:10ல் எல்லா மனுஷர்களின் இரட்சிப்பு என்று உள்ளது.

மிகவும் மகிமையான வசனம் இயேசு எல்லோருக்காகவும் மரித்தார் என்று 1 கொரி. 15:22ல் உள்ளது, ஆதாமுக்குள் எல்லோரும் மரிக்கிறது போல, கிறிஸ்துவுக்குள் எல்லாரும் உயிர்ப்பிக்கபடுவார்கள். அப்படியே ரோம். 5:18ல் இயேசுவை குறித்து, ஒரே நீதியினாலே எல்லா மனுஷருக்கும் ஜீவனை அளிக்கும் நீதிக்கு ஏதுவான தீர்ப்பு உண்டாயிற்று. பிள்ளைகள் பெறுவதற்கு முன்பே அப்பா ஆதாம் பாவத்தில் விழுந்துவிட்டார். ஆகவே எல்லோரும் துர்குணத்தில் உருவாகி பாவத்தில் பிறப்பதினாலே (சங். 51:5), எல்லோரும் மரிக்கும் தகுதி பெருகிறார்கள். ஆதாம் அனுபவமின்மையால் சட்டத்தை மீறுவான் என்று. தேவன் அறிந்திருந்தார், ஆகவே தான் 1பேது. 1:19, 20ன் படி உலகத்தோற்றதிற்கு முன்பே இயேசுவின் இரத்தம் எல்லோருக்காகவும் குறிக்கபட்டுள்ளது. எல்லோரும் ஆதாமில் தொலைந்து போனதால், தேவனுடைய கிருபையினால் ஒவ்வொருவருக்காகவும் மரணத்தை ருசிபார்த்தார் (எபி. 2:9).

யோவான் 1:7ல் இயேசுவைக் குறித்து, அவர் ஒளி, அவரை அனைவரும் விசுவாசிக்கவேண்டும் என்று. சொல்லப்பட்டுள்ளது. வசனம் 9ல் இயேசுவை பற்றி, உலகத்திலே வந்த எந்த மனுஷனையும் (எல்லோரையும்) பிராகாசிப்பிக்கிற ஒளியே அந்த மெய்யான ஒளி என்று. இது எப்படி சாத்தியம்? கோடான கோடி மக்கள் இயேசுவின் முதல் வருகைக்கு முன்பே மரித்துப்போய் இருக்கிறார்களே. அவர்கள் இந்த மெய்யான ஒளியை கண்டதில்லையே. அவர்கள் இயேசுவின் பெயரைக்கூட கேள்விப்பட்டது கிடையாதே. இயேசு வந்த பிறகும் நாம் இரட்சிக்கப்படும் படிக்கு வானத்தின் கீழெங்கும் மனுஷர்களுக்குள்ளே அவருடைய (இயேசுவின்) நாமமேயல்லாமல் வேறோரு நாமம் கட்டளையிடப்படவும் இல்லை என்கிற அந்த இயேசுவின் நாமம் அறியாமல் எத்தனையோ கோடி மக்கள் மரித்து போயிருக்கிறார்களே! நீங்கள் வேதம் வாசிப்பவர்கள் என்றால் நாம் இரட்சிக்கப்படும் படி இயேசுவின் நாமம் மாத்திரமே உள்ளது, விருதாவாக இரட்சிப்பு கிடையாது என்று அறிந்திருப்பீர்கள். இது முரண்பாடாகத் தெரியவில்லையா? இதற்கு பதில் 1 தீமோ 2:6ல் நாம் பார்ப்போம், . .. .. எல்லாரையும் மீட்க்கும்பொருளாகத் தம்மை ஒப்புக்கொடுத்த மனுஷனாகிய கிறிஸ்து இயேசு அவரே, இதற்குரிய சாட்சி ஏற்ற காலங்களில் விளங்கிவருகிறது. எல்லாருக்காகவும் மரித்தார் இயேசு என்று இதிலிருந்து விளங்குகிறது. எல்லாருக்காகவும் அவர் மரித்திருந்தாலும் அனைவரும் இதை அறிய வாய்ப்பு இல்லாமல் போவது எப்படி? இதற்கும் பதில் அதே வசனத்தில் இருக்கிறது, ஏற்ற காலங்களில் விளங்கும் என்று. சபைக்கு ஏற்ற காலங்கள் என்றால் இந்த கிறிஸ்துவ யுகமே. கிறிஸ்துவை அறியாதவர்களுக்கு ஏற்ற காலங்கள் கிறிஸ்துவின் 1000 வருட ஆட்சியின் காலமே.


எல்லோரும் கிறிஸ்துவின் நாமத்தை அறியும் காலம் இது அல்ல. இயேசுவின் முதல் வருகைக்கும் இரண்டாம் வருகைக்கும் நடுவே எல்லோரும் கிறிஸ்துவர்களாக மாற வேண்டும் என்பது தேவனின் திட்டம் இல்லை. அப்படி எல்லோருமே கிறிஸ்தவர்களாக மாறவேண்டும் என்றால் இது மாபெரும் தோல்வியே. ஏனென்றால், சுமார் 2000 வருடங்களில் உலகத்திலுள்ள மூன்றில் ஒரு பங்கு தான் கிறிஸ்துவை அறிந்தவர்களாக இருக்கிறார்கள். இயேசு சொன்னதே நீங்கள் எல்லோரும் சுவிசேஷத்திற்கு சாட்சியாக இருக்க வேண்டும் என்று, இயேசுவின் இரண்டாம் வருகைக்கு முன்பாக எல்லோரும் கிறிஸ்தவர்களாக மாற வேண்டும் என்று அவர் சொல்லவில்லை.

மாற். 4:11,12ன் படி தேவன் இந்த உலகத்தையே கிறிஸ்தவர்களாக மாற்ற விரும்பவில்லை என்று விளங்குகிறது. இயேசு தன் சீஷர்களிடத்தில் சொல்லும் போது, தேவனுடைய ராஜ்யத்தின் இரகசியத்தை அறியும்படி உங்களுக்கு அருளப்பட்டது; புறம்பே இருக்கிறவர்களுக்கோ இவைகளெல்லாம் உவமைகளாகச் சொல்லப்படுகிறது; அவர்கள் குணப்படாதபடிக்கும், பாவங்கள் அவர்களுக்கு மன்னிக்கபடாதபடிக்கும், அவர்கள் கண்டும் காணாதவர்களாகவும், கேட்டும் உணராதவர்களாகவும் இருக்கும்படி, இப்படி சொல்லப்படுகிறது என்றார். இந்த வசனத்தை நன்றாக தியானித்து பாருங்களேன்.

இயேசு எல்லோருக்காகவும் மரித்தது உண்மைதான், ஆனாலும் எல்லோரும் வேதத்தை புரிந்து கொள்ள முடியாமல் இருக்கிறார்களே, அதனால் கிறிஸ்தவர்களாக மாறாமல் பாவ மன்னிப்பு பெறாமல் இருக்கிறார்களே! வேதம் ஏதோ கோர்வையாக எழுதப்பட்ட ஒரு கதைப் புத்தகம் அல்ல,. தேவன் வேண்டுமென்றே வேதத்தை உவமைகளாகவும், அடையாளங்களாகவும் எழுதியிருக்கிறார், ஏனென்றால் அநேகர் மாறாமல் பாவ மன்னிப்பு பெறாமல் போவார்கள். அதனால்தான் இன்று கிறிஸ்தவர்களுக்குள்ளே 250 பிரிவினர்கள் இருக்கிறார்கள் ஏனென்றால் வேதத்தை தங்களுக்கு விரும்பியபடியே அர்த்தம் எடுப்பதனால். தேவன் இந்த உலகத்தை மாற்ற நினைக்கவில்லை, மாறாக தன் சிறு மந்தையை மாத்திரமே தெரிந்துகொண்டு இருக்கிறார். வேதத்தை புரிந்துக்கொள்வதனால் மாத்திரம் நித்தியஜீவன் உண்டாகும் என்று இருந்தால் நம் அன்பின் ஆண்டவர் (1 யோவான் 4:8) வேதம் அனைவரும் புரிந்துகொள்ளும்படியே மிகவும் எளிமையாக எழுதியிருப்பாரே.

அப். 15:14-17 வெளிப்படுத்துவது என்னவென்றால், தேவன் புறஜாதிகளிலிருந்து தமது நாமத்திற்காக ஒரு ஜனத்தை (எல்லோரையும் அல்ல) தெரிந்துகொள்ளும்படி முதலில் அவர்களிடத்தில் கடாச்ட்சித்தருளினார். தீர்க்கதரிசிகளின் வாக்கியங்களும் ஒத்திருக்கிறது. இயேசுவின் இரண்டாம் வருகையின் போது விழுந்துபோன தாவவீதின் கூடாரத்தை (தேவனின் ராஜ்யத்தை) எடுப்பித்து அதிலே பழுதாய்ப்போனவைகளை (மீதமுள்ளவர்கள்) மறுபடியும் சீர்ப்படுத்துவார். இயேசு பரம் ஏறின பிறகு தேவன் இந்த மனித சமூதாயமே மாறவேண்டும் என்று அல்லாமல், அவரின் நாமத்திற்கு என்று சிலரை கூப்பிடுகிறார். ராஜ்யத்தில் திரும்பும் போது, இப்போது வாய்ப்பு பெறாதவர்கள் அப்போழுது தேவனை அறிந்து கொள்ளும் வாய்ப்பு கிடைக்கும்.